Sen emoción non hai aprendizaxe .

 💚 Moitas grazas á nosa ANPA pola compra dos novos xogos para as aulas!

Os nenos e nenas están encantados e encantadas. Aprender xogando é moito mellor!

24 de outubro. Día das bibliotecas

 O noso centro celebra un ano máis o Día das Bibliotecas, que se conmemora o 24 de outubro, cunha semana chea de actividades pensadas para poñer en valor este espazo tan especial de aprendizaxe e descubrimento.

Durante os días previos, o alumnado participou nunha formación de usuarios, impartida polos compañeiros e compañeiras de 6º de Primaria, que explicaron como está organizada a nosa biblioteca, que servizos ofrece e como se poden atopar e empregar os seus recursos. Foi unha oportunidade estupenda para aprender e tamén para que o alumnado máis maior exercese de guías e formadores.

Un dos momentos máis especiais foi o concurso de deseño dun axudante para Cusco, a nosa querida mascota da biblioteca. O alumnado puxo toda a súa creatividade en marcha, presentando propostas orixinais e cheas de imaxinación.
En 3º de Primaria, o finalista foi Artai con "Casacol", e en 4º, Yoana coa súa creación, o gatiño "Noite", que se converteu finalmente na gañadora. Parabéns a ambos polo seu fantástico traballo!

E para culminar a semana, o 24 de outubro, realizouse a actividade “Xornalistas de investigación”. Nesta ocasión, os nenos e nenas convertéronse en verdadeiros detectives da información, comprobando a veracidade de distintas afirmacións mediante a búsqueda de respostas en diversas fontes. Foi unha actividade tipo “busca do tesouro”, divertida e moi educativa, que axudou a poñer en práctica o pensamento crítico e a habilidade para distinguir entre feitos e opinións.

Como broche final desta xornada tan especial, todo o alumnado recibiu unha galleta decorada co cartel do Día das Bibliotecas

 
📖 Feliz Día das Bibliotecas!

Aprendendo a reciclar

 Hoxe visitounos a nosa nova amiga Nuria, traballadora de Ancaria-Xestión Medioambiental, para explicarnos moitas cousas interesantes sobre a reciclaxe. A verdade é que algunhas delas xa as sabiamos pero nunca está de máis lembralas e, sobre todo, levalas á práctica. Soamente temos un planeta onde vivir e temos que facer todo o que estea nas nosas mans para conservalo e coidalo cada día.

Grazas a Nuria e tamén ao Concello de A Capela por traernos unha actividade tan interesante.

💚💚💚💚

Benvidos e benvidas ao novo curso 2025-2026

 Un pouco de arte enmarcado no noso Proxecto Documental  Integrado "Capelarte", galletiñas da fortuna con mensaxes positivas para este curso e unha decoración ben bonitiña e especial que con tanto agarimo nos preparou a nosa ANPA, grazas!💕

Felices vacacións!

Fin de curso

Días cargadiños de actividades grupais, diversión e emocións. 

  xoves 19

 

  venres 20

grazas á nosa ampa por facer posible un día tan especial 

 

 

 

 

 

Saída Granxa do Souto

Día máxico.❤

Día do medio ambiente

O pasado xoves 5 de xuño achegouse o distrito forestal de Ferrol a celebrar con nós o día do medio ambiente, compartimos un tempo ben divertido cheo de aprendizaxe. Grazas ao conto dos bolechas que nos contaron Sara e Raúl sabemos un pouquiño máis sobre os montes de Galicia, as persoas dedicadas a previr os incendios forestais, as ferramentas e vehículos que empregan...

Infinitas grazas a Martín e Mónica por contarnos con tanta paixón en que consiste o voso traballo e transmitir dun xeito tan agradable o respeto polo medio ambiente e a importancia de coidar os nosos montes.

E por suposto grazas aos bombeiros por tan marabillosa demostración e por mostrarnos os equipos que forman parte do seu día a día.

17 de maio Día las Letras Galegas.

Este ano o Día das Letras Galegas está protagonizado polas cantareiras e as cantigas tradicionais galegas. 👏👏👏

Dende o cole traballamos este día tanto a nivel aula como a nivel cole. 

Na aula levamos a cabo un traballo de investigación sobre as cantareiras e valoramos a importancia que tiveron na preservación da lingua galega a través das súas cantigas, que se transmitiron de nais a fillas, de avoas a netas, e entre a veciñanza. Para representar a estas mulleres tan importantes foron escollidas Adolfina e Rosa Casás, Eva Castiñeiras e Prudencia, Asunción Garrido e Manuela Lema, tres das integrantes das Pandeireteiras de Mens. 

Xa todos xuntos tivemos a oportunidade de escoitar a un grupo de cantareiras ben especial, as nosas cantareiras, as cantareiras da Capela, froito da actividade extraescolar de pandeireta, que ben o fixeron! 💓

Grazas tamén a Jose a Bea a Carlos, o profe de pandeireta, e a David, o noso profe de música. Grazas por estas pezas tocadas con tanto agarimo e por preservar e transmitir unha tradición tan importante na nosa cultura como é a música.

Día do libro

 
Con motivo do día do libro este luns tivemos unha visita ben especial, a de Paula Carballeira Cabana autora, entre outros, do libro Carabela escollido polo segundo ciclo para traballar neste segundo trimestre. Este libro conta a historia de Carabela, a cociñeira dun barco que naufraga na Illa Pequena de Plástico, onde está soa e rodeada de peixes mutantes que a advirten que son tóxicos, de paxaros que tamén se queixan por comer substancias nocivas… Para aliviar a tristeza, Carabela constrúe unha nena de Plástico á que lle conta historias de como é o mundo fóra da Illa Pequena. Neste libro Paula lánzanos unha mensaxe sobre a importancia de que coidemos o noso medio ambiente e recórdanos que planeta non temos máis ca un.

Os nenos, nenas, mestres e mestras desfrutamos dun anaco ben divertido cheo de historias segredas narradas con moita paixón e cariño.

E... como non podía ser doutro xeito os nenos e nenas de todo o cole prepararon unha sorpresa para Paula: unha obra de teatro baseada nos seus libros. Podedes visualizala no blogue da biblioteca.

Viaxe á Cidade da Cultura

 O venres 25 de abril desprazámonos ata a Cidade da Cultura, en Santiago. A nosa querida ANPA organizou esta saída que resultou moi divertida e enriquecedora. Os nenos e nenas de terceiro tivemos unha visita guiada pola Biblioteca de Galicia . Cantos libros hai alí!!! Tamén nos agasallaron cun libro e unha libreta. Os rapaces e rapazas de cuarto no Museo Centro Gaiás fixemos unha viaxe virtual a onde todo comezou. Aínda nos dura a impresión que nos causou esta experiencia.

Grazas á nosa ANPA por facer posible esta viaxe!

💓💓💓

Día do Libro na Casa da Cultura

 O 23 de abril celébrase o Día do Libro e, para conmemorar esta data tan importante, a Biblioteca Municipal da Capela convidounos ao espectáculo " Maxia tola e lectora ", a cargo de Leo Leíño.

Pasamos unha hora moi divertida con esta mistura de maxia e contos que nos sorprendeu e nos fixo rir  moito. Grazas ao Concello da Capela e a Maribel, a bibliotecaria, por traernos actividades tan bonitas!

👏👏👏👏

Saída a Ferrol.

 Durante a mañá do pasado xoves 13  gozamos dun concerto didáctico marabilloso ofrecido pola banda do Terzo Norte da Armada, e...sabedes que? Tivemos un director de bada moi especial, o noso compañeiro Noé👏

Tamén visitamos o Museo de Historia Natural de Ferrol onde tivemos a oportunidade de admirar herbarios, algarios, insectos, o esqueleto dunha balea común de 18m, dermoplastias de cetáceos, focas e tartarugas, raras especies de quenllas, cunchas...

Grazas á Banda do Terzo Norte e a Rebeca do MHN de Ferrol por compartir tanto coñecemento e tanta paixón polo que facedes!