Bo verán!

Fin de curso

 O tempo pasou voando e, aínda que pareza mentira, o curso 2025-26 xa é historia. Foi un ano cheo de aprendizaxes, diversión, momentos inesquecibles cos nosos compis e mestres/as... E para rematar, o xoves pasámolo xenial na excursión a Roq Park, en Viveiro e o venres, coma sempre, tivemos a festa de fin de curso que nos trouxo a nosa querida ANPA. Ademais, tamén nos visitou o mago Dani, sempre tan orixinal e sorprendente.

Agora toca descansar  e recargar as pilas para voltar en setembro coas mochilas cargadas de ilusión.

Feliz verán!!!!  💓💓💓💓💓💓

Día do Medio Ambiente no río Sesín

 O 5 de xuño celébrase o Día Mundial do Medio Ambiente. Para conmemorar esta data tan importante desprazámonos ata o río Sesín cos nosos compis de quinto e sexto. Da man do noso amigo Ángel, de EuroEume, fixemos varios traballos de investigación sobre as distintas especies vexetais e animais deste ecosistema. Foi unha xornada moi especial para seguir apreciando a riqueza paisaxística e a grande biodiversidade que temos a sorte de atopar na nosa contorna. Todos e todas somos responsables de seguir coidando este tesouro natural para que as xeracións futuras poidan disfrutar del coma nós agora.

Grazas Ángel!        💚💚💚💚💚

Letras galegas 2026

 O 17 de maio celébrase, dende 1963, o Día das Letras Galegas. Ao longo desta semana xa estivemos traballando na clase a vida e a obra de Begoña Caamaño, a autora homenaxeada este ano. 

E como fin de festa, as nenas e os nenos que van á actividade de pandeireta agasalláronnos cun fermoso concerto no que amosaron a súa arte cantando e tocando. Foi realmente espectacular! Noraboa a todos e todas!

💓💓💓💓

Un día de radio

Hoxe tivemos a visita de Damián, formador e actor de doblaxe. Ensinounos como facer un programa de radio, dende escribir un guión ata falar diante do micro e controlar todos os aspectos técnicos. Foi unha mañá diferente e moi divertida. Poidemos estrear todo o material da aula de radio do cole e pasámolo xenial gravando un programa entre todos os nenos e nenas de 3º, 4º, 5º e 6º. Aprendemos moito e estamos desexando traballar máis con este medio tan apaixoante que nos permite facer cousas xeniais!

Moitas grazas Damián!!!!

💚💚💚💚

Exhibición solidaria da Garda Civil en Pontedeume

A Garda Civil celebrou  unha exhibición solidaria no Pavillón Municipal de Deportes “A Casqueira” de Pontedeume, unha xornada  na  que puidemos coñecer de preto o traballo dalgunhas das súas especialidades e capacidades operativas.

Desfrutamos de demostracións en directo das súas técnicas de intervención e do seu labor diario así coma do instrumental, equipos de protección, vehículos... que empregan no seu traballo diario. 

Ademais os nenos e nenas tiveron a oportunidade de colaborar coa doazón de alimentos non perecedoiros, que serán destinados a entidades sociais locais. Un pequeno xesto pode marcar a diferenza para moitas familias.

Padriños e madriñas de lectura

Hoxe na hora de ler fomos lerlles contos aos nenos e nenas de Infantil. Compartir ese tempo de lectura con eles e elas foi unha experiencia inesquecible. A verdade é que lles gustou tanto que tivemos que alongar o tempo e lerlles varios contos, pois un só parecíalles pouco.

Imos repetir esta actividade o vindeiro mes e xa estamos contando os días...

💓💓💓💓

Raposadas

 Para conmemorar o Día do Libro, a Biblioteca Municipal da Capela convidounos hoxe a unha sesión de contacontos a cargo de Raquel Queizás: " Raposadas, contos para nenas e nenos ". Fartámonos de rir coas historias que nos contou. Moitas grazas a Maribel e á Concellaría de Cultura por traernos actividades tan divertidas.

👋👋👋👋

Día do Libro

 Coma cada ano, o 23 de abril celebramos o Día do Libro. Visitounos José Antonio Abad,  psicólogo infantil, divulgador da música clásica e escritor. Falounos da relación entre música e literatura, entre outras cousas. Explicounos todos os segredos do libro "Os Planetas" que estivemos traballando nas últimas semanas. Fixemos  unha viaxe apaixoante polo Universo coa axuda da  nosa imaxinación.

💓💓💓

Outro xeito de comunicarnos

 Da man do persoal do proxecto ENKI aprendemos todos os segredos da lingua de signos. É unha maneira moi útil para comunicarnos con persoas que teñen algunha dificultade ou non poden oír. Foi moi interesante aprender algunhas palabras e poder expresarnos coas nosas mans. Por riba, deixáronnos un mural moi bonito co alfabeto na lingua de signos para que poidamos practicar. Así que xa podemos dicir que dominamos unha nova lingua... 😜😜

 

Superheroes e superheroínas da hixiene dental

 A nosa nova amiga, a odontopediatra Lucía Villar falounos da importancia do coidado diario dos nosos dentes. Explicounos cal é a mellor maneira de coidalos para ter un bonito sorriso e, sobre todo, unha boa saúde bucodental. A verdade é que a maioría dos consellos que nos deu xa os sabiamos, pero outros non e agora somos máis conscientes da importancia de coidar moi ben as nosas pezas dentais. Esperamos que non se nos esqueza...  😁😁😁

 

8M

Coma cada ano celebramos no cole o 8 de marzo, para homenaxear a todas as mulleres do mundo, ás que lles debemos todo o que somos e mesmo a nosa propia existencia. Este ano tivemos un contacontos teatralizado titulado "E ti que queres ser de maior?" que nos trouxo a  nosa querida ANPA. Pasamos un rato moi divertido e aprendemos cousas interesantes sobre algunhas mulleres importantes ao longo da Historia. Aínda que para nós todas son moi importantes!

Tamén quixemos facer un agasallo para as nosas nais, avoas, amigas, etc. Quedounos bastante ben e gustoulles moito!

💓💓💓💓

 

 

Día de Rosalía. 23 de febreiro de 2026

O pasado 23 de febreiro celebramos no noso centro o Día de Rosalía cunha fermosa actividade organizada polo alumnado de terceiro e cuarto de primaria, que asumiu con grande responsabilidade a preparación deste evento tan especial.

Durante a xornada, os nenos e nenas ofreceron unha interesante presentación sobre a vida e obra de Rosalía de Castro, achegándonos á figura dunha das escritoras máis importantes da nosa literatura. Ademais, emocionaron a toda a comunidade educativa coa recitación de varios dos seus poemas máis coñecidos.

Como parte da celebración, tamén coordinaron a elaboración dun mural colectivo que xa loce na entrada do colexio, enchendo o espazo de cor e cretividade.

Para máis información e detalles sobre as actividades realizadas, podedes visitar o blog da biblioteca do centro facendo clic aquí

 

Entroido 2026

 

Formación en seguridade e saúde

 Hoxe tivemos unha charla moi interesante coas doutoras Patricia Martínez, Ágata Vázquez e Maurenis Alonso, que viñeron ao colexio para falarnos do 112 e de como actuar nunha emerxencia. Aprendemos a poñer a unha persoa na posición de seguridade, a chamar pedindo axuda e tamén que é a respiración cardiopulmonar (RCP). Foi unha experiencia moi importante, porque agora sabemos como axudar se alguén o necesita. 

Grazas pola vosa visita! 💙

30 de xaneiro día escolar da non violencia e da paz.

 Hoxe o noso patio encheuse de cor e ilusión coa actividade da paz. Cada neno e nena elaborou o seu propio símbolo da paz empregando materiais tan diversos como cartón, lá, papel, flores e tea, creando así unha explosión de creatividade e alegría.

Para completar o acto, soltamos dous globiños con forma de pombas , que voaron simbolicamente cara ao ceo levando connosco un desexo dun mundo solidario e libre de violencia.

Foi unha xornada sinxela pero chea de significado, na que o alumnado aprendeu que a paz tamén se constrúe con pequenos xestos. 

ComunicArte, Comunicación, convivencia e Benestar para a comunidade educativa.

 O pasado martes iniciamos a nosa primeira sesión do programa ComunicArte. Este programa está orientado a toda a comunidade educativa e pretende contribuír ao benestar dos seus membros e previr a violencia en todas as súas formas, achegando ferramentas e estratexias en materia de comunicación respectuosa, comunicación non violenta, xestión emocional, negociación e resolución de conflitos, entre outras. Todo isto desenvolverase a través de talleres teórico-prácticos que desfrutaremos ao longo das vindeiras semanas.

Grazas, Verónica e Vanesa, por facernos pasar un anaco ben divertido e cheo de aprendizaxe e reflexión!